بدي أحكي

تحياتي للجميع

من فترة طويلة تراودني فكرة ومش عم نفذها لأسباب أكتر من كتيره, والفكرة هي انه من منطلق معايشتي لواقع الانسان الفلسطيني تحت الاحتلال وفي ظل بقايا الانتفاضة اسماً, أن أكتب ما أراه وأسمعه من أحداث على اختلاف أهميتها , ذاكرة رأيي فيها, تأثيرها على وعلى من حولي

شو الاسباب اللي منعتني لغاية الان من الكتابة ؟؟

أول وأهم سبب أنه أمام هالأحداث أفقد قدرة التعبير عنها, في اللحظات الاولى بيكون عندي توتر كبير,قهر,غضب,إحتقار ونقمة لكل وعلى كل شي, وببدأ السباب واللعنات على أعلى مستوى, وأحيان كتيره التعصيب بيشمل كل شي حولي, وطبعاً بهيك حالة مش حلاقي رغبة أو فائدة من الحكي والكتابة , وأي طريقة للتعبير تصبح عبث...

أما السبب التاني مش عم لاقي فائدة من الكتابة , رح تقولوا كيف ما في فائدة وانت ما جربتي لسه, معكن حق اذا كان قصدي أنه لا فائدة من كتابتي أنا, لكن انا قصدت أنه لا يوجد مردود أو فائدة من الكتابة عن الواقع الفلسطيني بشكل عام, وهو أمر ألمسه في كل مكان سواء في الصحف أو التلفزيون أو حتى على الانترنت . فكل ما يذكر يواجه اما بكلمة يا حرام , او بالكتير شوية تعصيب وزيادة قرف من هالعيشه, فلشو بدي زيدها على الناس يعني , فبلاقي افضل انه ما أكتب أو أحكي عملاً بالقول ما في حدا لا تندهي . رح أكتفي بهالسببين لأنه بوجودهن ما بيعود في مجال لذكر الاسباب الاخرى, اما اذا تجاوزتهن فمعناه انه كل سبب اخر يمكن تذليله.

ليش الأن بالتحديد ممكن أكتب ؟؟

بدي عمم كل اللي عم نمر فيه احنا الفلسطينيين , حتى كل الناس تقدر تلمس شيء من واقعنا.

بدي أرفع الصوت , عسى انه يكون مين يسمع.

بدي أسقط القناع الاعلامي اللي بيشوه صورتنا وحالنا.

بدي غير طريقة خطابنا للأخرين.

هيك وأكتر أنا بدي أحكي.