Sunday, August 27, 2006

حكمة الله

تفسير المثل القائل ( لا كرامة لنبي في وطنه ) .. وتبعاته

يعني ما في نبي خلقه الله الا وضربوه اهله او قتلوه..عيسى , مين صلبه ؟ اليهود مع انه اصلا يهودي ابن يهوديه مش ابن يهودي.محمد , مين ضربه ودبرله مليون مكيده ليقتله ويخلص منه ؟ أهل قريش طبعاً مع انه قرشي ابن قرشي, بس مش ابن قرشيه , امه كانت من المدينه اصلاً .لوط , مين كان بدو يغتصبه ويقتله , بس ما طلع بايدهن الا يضطهدوه ؟ أهله مع انهم كلهم لواطيين بس اكيد هو مش ابن لوطي والا كيف نخلق يعني, فكروا فيها بالعقل .موسى , مثلاً امه رمته في النهر لتحميه !!! وانقذته زوجة فرعون مع انه عدو لفرعون نفسه , شوفوا الصدف !! موسى حياته تحفه , كلها صدف ومليانه طلوع ونزول, بعد ما رباه فرعون كبر موسى وصار يدافع عن اليهود وقتل واحد مصري , هرب على فلسطين من سطوة اللي رباه , تزوج بنت الراعي اللي حماه , بعدها طلب منه الله يرجع لفرعون لحتى يربيه , وهكذا كان , رجع ودافع عن اليهود وهرب فيهم على فلسطين مرة تانية ( سمحناله دخل بحماره ) يلا المسامح كريم , المهم انه هالناس اللي حماهم ووعدهم بالنعيم خانوه وسودوا وجه قدام الله , مات من القهر في سينا , لكن في ناس بيقولوا انه دخل فلسطين لوحده دون شعبه بالسر .. والله أعلم .يوسف , اخوته غدروا فيه ورموه في البئر , غيرة وحقد , بس الله نجاه واشتغل عند فرعون , طمعت فيه زوجة فرعون , مش نفس زوجة فرعون اللي انقذت موسى , واحدة تانية لكن الظاهر كل زوجات فرعون عندهم ذات الميول أو انه كل الفراعين كان عندهم نفس "المشكلة" , المهم .. سجنه فرعون وأطلق سراحه بعد كم سنه لأنه فسر له حلم , رجع شغله , التقى بأهله وكمان سودوا وجهه قدام الفرعون ودبرولوا المصايب .لسه في نوح , ابراهيم , يونس , صالح , ذي النون , شعيب , ..... الخالملاحظ أنه المصائب والصعوبات التي مني بها الأنبياء كانت تعتمد أساسأ على اعتبارات قومية ونَسَبيةَ ومشاكل غرائيزية واعتبارات اجتماعية , جاؤا لتغيير ما كان الوضع عليه ولم يفلح الكثيرون منهم , أفلح البعض لفترة من الزمن , مجموعة غيروا وتغيروا , البعض أنقذ ما يمكن انقاذه. أقوام الأنبياء رفضوا رسائل الأنبياء لأنها خارجة عن معتقداتهم , بالرغم من أنها تنادي بالتغيير للأفضل . زمن الأنبياء كان قديماً وولى , لكن زمننا لا زال قائم , احنا ما عنا أنبياء , عنا رؤساء الله ينجينا , عنا قيادات , كمان نزلت علينا من السما , غالبيتهم ما الهم أصل أو فصل , ما معروف مين امه ومين أبوه في أغلب الأحيان ,كتر خير الله يعني ما في اختلافات نَسبية أو قومية. زوجاتهم بيعملوا اي شي بدهم بالعلن وعلى عينك يا فرعون اللي ما بيسترجي يحكي , يعني كمان خلصنا من اشباع الغرائز واغراءات الخيانة , شهامة فرعون وثورته لشرفه . قادتنا ما جايين يغيروا شي , بالعكس هم بدهم نبقى على ما احنا عليه , همهم بس ننام وهم يغطونا , واذا زاح الغطا عنا مش مشكلة اصلاً الجو حر كتير . احنا مش قرشيين أو لوطيين أو فراعنه أو حتى يهود خزاهم الله كيف ما تلفتوا , احنا شعب مسكين طفران عايف اللي خلقه , ماشي الحيط الحيط وبيقول يالله السلامه , احنا مش جبنا أو خاملين , لكننا نقدم الطاعة لأنبياء الله الجدد . مسكين هالشعب , زمان تمرد على الأنبياء ورفض طاعتهم , فالله غضب عليه وعمل فيه العمايل وصار مثل ينحكى . ولما حب يعمل فصح ويتعلم من تجارب أسلافه لحتى الله ما يغضب عليه , قِبل هالأنبياء الي نزلوا من السما , وسلم أمره لهم , كمان الله غضب عليه وصار يضرب فيه شمال يمين . طيب احترنا مع الله شو نعمل ؟!! في شي مش منطقي والصورة أبداً ما راكبه صح , فيها خلل . يعني معقول يكونوا أنبياء زمان هم قادة اليوم ؟!معقول قبائل الأمس البعيد جداً هم مَدَنية اليوم ؟!فكركم قادتنا خلقة الله متل الأنبياء أو شو ؟!زمان كانوا الأنبياء هم المضطهدين, واليوم صاروا الأمر الناهي , والقائد خليفة الله على الأرض؟!هالشعوب اللي كانت بقصيدة شعر تسير قبائل للحرب , متل ما عملت هند بنت النعمان ضد كسرى , هي نفسها اللي بتطرب لصرخات القتلى ؟!

طيب انتوا شو رأيكم في الصورة ؟؟



powered by ODEO

No comments: